Kontrollistum muorâ
FSC-sertifisistum amnâseh iä lah vala tuárvi finnimist markkânijn. Kontrollistum muorâ standard lii vuávájum taan čuolmâ čuávdusin. Sertifisistum amnâsân puáhtá siävuttiđ sertifisistmettumis, mutâ kuittâg tiätu ucemus kriterijd tevdee amnâs – tärhis kriterijguin já čovgâ kocemist. Maaŋgah muorâalgâliih pyevtittâsah siskeldeh-uv sááiguid maaŋgâin sierâ käldein. Tágáreh siävuttum amnâsijn rahtum pyevtittâsah láá merkkejum FSC Mix -merháin.
Algâpuáttimkuállus standard siskeeld čovgâ njuolgâdusâid tast, maht já mon ennuv siävuttem puáhtá toohâđ. Tot váátá, ete puoh sertifisistmettumis amnâseh kalgeh puáttiđ koccum já tohálijn käldein. Taan tuođâštem várás annoo kontrollistum muorâ standard.
FSC-merkkejum pyevtittâssáid ij tuhhiittuu muorâ, mii lii:
• lavâttáá čuoppum
• puáttám kuávluin, kost ärbivuáváliih vuoigâdvuođah teikâ siiviilvuoigâdvuođah luávkkájuvvojeh
• puáttám vuovdijn, kost vyevdikevttim áštá ollâ suojâlemáárvuid
• puáttám kuávluin, kost luánduvyevdi lii čuoppum muorâplantaas tâi eres sajanpuáttee eennâmkevttimhäämi oovdâst
• geenijnis tááhust nubástuttum.
FSC čuákkejum aalmuglii riskâárvuštâllâm kalga anneeđ puoh irâttâsâin, moh halijdeh skappuđ kontrollistum muorâkálvu Suomâst. Ij-tohálii amnâs kevttim riiskâ kalga meddâlistiđ tâi tom ferttee vyelediđ tuárvi.
Kontrollistum muorâ standard tuáimá meiddei jiečânâs, FSC-vyevditipšom standard keppisub vyevditipšom standardin. Adai vyevdi puáhtá sertifisistiđ kontrollistum muorâ standardijn. Kontrollistum muorân kyeskee nabdosijd ij kuittâg uážu muštâliđ markkânistmist, ijge pyevtittâssáid pyevti merkkiđ mainâšume FSC-kontrollistum muorâst. Kontrollistum muorâkáálvun kyeskee informaatio sirdoo tuše irâttâsâi koskâsii viestâdmist muorâ algâpuáttim kavnâttem várás. Kontrollistum muorâ annoo tuše FSC Mix -pyevtittem uássin.